നമ്മുടെ നിയമസഭയില്‍ എന്താണ് നടക്കുന്നത് ?എന്താണ്,എന്തിനാണ് ജനപ്രതിനിധികള്‍ നിലവാരമില്ലാത്ത നാടകം കളിക്കുന്നത്?സഭയില്‍ ഓരോരുത്തര്‍ക്കും തങ്ങളുടെ അഭിപ്രായം പറയാ മെന്നിരിക്കെ ഇവര്‍ എന്തിനാണ് മുഷ്ടി ചുരുട്ടുന്നതും പല്ല് കടിക്കുന്നതും?
പ്രതിപക്ഷം എന്നാല്‍ ഭരണകക്ഷിയെ നിരന്തരം പല്ലും നഖവും ഉപയോഗിച്ച് എതിര്‍ക്കുന്നവര്‍ എന്നാണോ അര്‍ഥം?ജനവിരുദ്ധമോ രാജ്യവിരുദ്ധമോ ആയ നിലപാടുകള്‍ ഭരിക്കുന്നവര്‍ക്ക് ഉണ്ടെങ്കില്‍ എതിര്‍ക്കണം.അല്ലാതെ ഭരണകക്ഷിയെ എതിര്‍ക്കുക എന്നത് ഏകഅജണ്ടയായി പ്രതിപക്ഷം ഏറ്റെടുക്കുമ്പോള്‍ അവര്‍ക്ക് എന്ത് ഉത്തരവാദിത്തമാണ് ജനങ്ങളോടും നാടിനോടും ഉള്ളത്?
തന്റെ അച്ഛനെ പറഞ്ഞു എന്ന് കരഞ്ഞത് ഒരു ജനപ്രതിനിധിയാണ്.പലരുടെയും തന്തക്ക്‌ വിളിച്ചു ശീലിച്ചവര്‍ക്ക് വാവിട്ടുകരയാന്‍ മാത്രം ഇതില്‍ എന്താണുള്ളത്?അപ്പോള്‍ ആ കരച്ചില്‍ പോലും ഒരു നാടകമായിത്തീരുന്നു."വായില്‍ തോന്നിയത് കോതക്ക് പാട്ട്"എന്ന മട്ടില്‍ വാചാലരാകുന്നവര്‍ തങ്ങളുടെ ആക്രമണശരങ്ങള്‍ ഏറ്റു പിടയുന്നവര്‍ക്കും കുടുംബം ഉണ്ട് എന്ന് ഓര്‍മിക്കാറില്ല.
നാക്കെടുത്താല്‍ വീരസ്യം മാത്രം പറയുന്ന വീരന്മാര്‍ മാധ്യമങ്ങള്‍ക്ക് മുമ്പില്‍ ഭീരുവിനെപ്പോലെ കരയുമ്പോള്‍,ലജ്ജിച്ചു തല താഴ്തുകയല്ലാതെ നാം എന്ത് ചെയ്യും?വിമര്‍ശനങ്ങളില്‍ മാന്യത പുലര്‍ത്താനുള്ള വിശാലത എല്ലാവര്‍ക്കും വേണ്ടതല്ലേ?ഭിന്നധ്രുവങ്ങളില്‍ ആണെങ്കിലും ജനനേതാക്കള്‍ എന്ന പരിഗണന പരസ്പരം ആവശ്യമല്ലേ?
പ്രതിപക്ഷം തങ്ങള്‍ക്ക്‌ ഭരണം നഷ്ടപ്പെട്ടിരിക്കുന്നു എന്നും അത് ജനവിധിയാണ് എന്നും തിരിച്ചറിയണം.ഭരണപക്ഷം വിവാദങ്ങള്‍ക്ക് ഇട നല്‍കാതെ ഭരിക്കാന്‍ ശ്രദ്ധിക്കുകയും വേണം.ആക്രമിക്കാന്‍ മുഹൂര്‍ത്തം തേടുന്ന പ്രതിപക്ഷത്തിന് ആയുധം കൊടുക്കാതിരിക്കാനുള്ള സൂക്ഷ്മതയെങ്കിലും ഭരണപക്ഷം കാണിക്കേണ്ടതല്ലേ?
തന്തക്കുവിളിയും എടാ വാടാ വിളിയും കാലെടുത്തുയര്‍ത്തലും മുട്ടിനു മുട്ടിനു സ്പീക്കറുടെ മുമ്പിലേക്ക് പായലും.....കോടിക്കണക്കിനു ജനങ്ങളുടെ നേതാക്കള്‍ ഇമ്മട്ടില്‍ തരം താഴുമ്പോള്‍ അപമാനം സഹിക്കുകയല്ലാതെ എന്ത് ചെയ്യും?
അച്യുതാനന്ദനെ ഗണേഷ്‌കുമാര്‍ വിമര്‍ശിച്ചത് അതിര് കടന്നു പോയി.അച്യുതാനന്ദന്റെ പ്രായമാണ് എല്ലാവര്‍ക്കും പറയാനുള്ള പോയിന്റ്‌ .ശരി,അത്രയും പ്രായമുള്ള അച്ചുതാന്ദനും ചില മര്യാദകള്‍ പാലിക്കാന്‍ ബാധ്യസ്ഥനല്ലേ? എതിര്‍പക്ഷത്തെ പലരെയും പകയോടെ വേട്ടയാടുമ്പോള്‍ ഈ പ്രായം മാനിക്കാത്തത് എന്താണ്?
നമ്മുടെ സാമാജികരുടെ പെരുമാറ്റരീതികള്‍ പലപ്പോഴും അസഹനീയമായിപ്പോകുന്നുണ്ട്.
വര്‍ഷങ്ങളായി ഒരേ നാടകത്തിന്റെ തനിയാവര്‍ത്തനങ്ങള്‍.ചില പുതിയ പ്രതിനിധികള്‍ എല്ലാ മര്യാദയും ലംഘിച്ചു സ്പീക്കറെയും അവഹേളിക്കാന്‍ ശ്രമിക്കുന്നു.ആത്മസംയമനം ഒരു നിമിഷത്തേക്ക് പോലും ചിലര്‍ക്ക് പാലിക്കാന്‍ ആവുന്നില്ല.ഇവര്‍ക്ക് എങ്ങനെ ജനാധിപത്യത്തിന്റെ സംരക്ഷകരാവാന്‍ കഴിയും?ജനങ്ങളുടെയും നാടിന്റെയും സംരക്ഷകരാവാന്‍ കഴിയും?സഭാനടപടികള്‍ ലൈവ് ആയി കാണുന്ന നമുക്ക് അഭിമാനിക്കത്തക്ക ഏതെങ്കിലും ഒരു നിമിഷം വീണു കിട്ടുന്നുണ്ടോ? അത്രയ്ക്ക് ഹതഭാഗ്യരായിരിക്കുന്നു നാം.
